Fjármál og rekstur

Upplýsingatækni

Nýtt stjórnkerfi

Tekið var í notkun nýtt stjórnkerfi á vegum upplýsingatæknideildar í upphafi ársins sem hefur það hlutverk að fylgja eftir stefnumótun Hagstofunnar fyrir árin 2020-2025.

Bætt þjónusta og nýr búnaður

Áhersla upplýsingatæknideildar var annars vegar á það að bæta innri þjónustu Hagstofunnar og hins vegar að skipta út gömlum búnaði í upplýsingatækni fyrir nýjan og sjálfvirkan búnað.

Til þess að bæta innri þjónustu setti upplýsingatæknideild af stað þjónustukönnun á meðal starfsmanna, bæði í þeim tilgangi að kanna hversu ánægðir starfsmenn væru með þjónustuna og einnig til þess að greina betur með hvaða hætti væri best að forgangsraða umbótavinnu deildarinnar. Þjónustukönnunin var gerð bæði í upphafi árs og um miðbik ársins til þess að fylgjast vel með umbótavinnunni.

Seinna markmiðið, að skipta út gömlum búnaði, hófst á því að skipta út tölvukosti í úthringiveri Hagstofunnar enda var fyrri búnaður kominn vel til ára sinna. Um svipað leyti var skipt um símkerfi stofnunarinnar.

Fjarvinnutengingar

Kórónuveirufaraldurinn hafði mikil áhrif á áætlanir upplýsingatæknideildar. Skipuleggja þurfti tengingar vegna fjarvinnu fyrir starfsmenn Hagstofunnar nánast fyrirvaralaust.

Allir starfsmenn Hagstofunnar, að frátöldum starfsmönnum í móttöku, höfðu á þeim tíma fengið fartölvur til notkunar í störfum sínum. Kom upplýsingatæknideild á tengingu fyrir fjarvinnu fyrir alla starfsmenn og útvegaði móttökunni fartölvur svo hægt væri að veita þjónustu í gegnum síma þrátt fyrir að húsnæði stofnunarinnar væri lokað.

Einnig setti upplýsingatæknideild upp fjarfundalausnir sem starfsmenn gátu nýtt til þess að vinna saman í fjarvinnunni. Var fjarfundaherbergi nýs fjarfundabúnaðar, sem settur hafði verið upp í janúarmánuði til þess að auðvelda samvinnu við Eurostat, hagstofu Evrópusambandsins, nýtt fyrir fjarvinnuna.

Pólstjörnuverkefnið

Hinn 1. júni 2018 keypti fjármála- og efnahagsráðuneytið, fyrir hönd A-hluta stofnana ríkisins, Microsoft-hugbúnaðarleyfi fyrir skrifstofuumhverfi. Verkefnið, sem snýr að þessum samrekstri Microsoft-umhverfisins hjá opinberum aðilum, fékk nafnið Pólstjarnan.

Haustið 2020 var skipað sérstakt Pólstjörnuteymi á Hagstofunni sem fékk það hlutverk að greina mögulegar leiðir til innleiðingar á Microsoft 365 hjá stofnuninni. Hópurinn gerði drög að innleiðingaráætlun með það fyrir augum að hin nýju kerfi og forrit sem fylgja Microsoft-umhverfinu nýtist sem hagkvæmast og best í starfsemi Hagstofunnar.

Innleiðingunni mun fylgja upptaka Outlook/Exchange-póstforrits og -netþjóns og notkun á Teams-fundar- og teymisverkfærinu. Innleiðingin hefst að vori 2021 þar sem upptaka Outlook/Exchange verður í forgangi.

Nýr innri kerfisvefur

Um sumarið útfærði upplýsingatæknideild búnað til þess að auðvelda hagskýrslugerð út frá ársreikningum Skattsins. Ný leið, svokallaðir hnappsreikningar, var ekki til staðar í eldri búnaði og því þurfti aðra nálgun fyrir verkefnið.

Skömmu síðar voru gerðar tilraunir með að safna gögnum í gegnum nýja og notendavænni vefsíðu. Kerfið mun leysa af úrelt kerfi sem hefur valdið notendum sem skila inn gögnum til Hagstofunnar miklum vandræðum. Fyrstu safnanir sem voru settar upp í nýja kerfinu gáfu góða raun. Í framhaldinu verða fleiri safnanir fluttar yfir í nýja kerfið.

Með nýju kerfunum fyrir gagnaskil annars vegar og meðhöndlun ársreikninga hins vegar, auk kerfis fyrir meðhöndlun gagnamiðlunar til notenda, myndaðist nýr innri kerfisvefur. Sá vefur hefur þann kost að nú getur starfsfólki á einum stað komist í þau vefviðmót sem það þarf að vinna í hverju sinni.

Önnur verkefni

Á meðal annarra helstu verkefna upplýsingatæknideildar á árinu var flutningur gagna af eldri skráaþjóni yfir á nýrri þjón sem lokið var við um haustið. Eldri þjónninn var á þeim tíma orðinn 17 ára gamall en hafði þjónað stofnuninni dyggilega. Fyrr á árinu hafði klárast flutningur af álíka gömlum gagnagrunnsþjóni yfir á nýrri þjón.

Til þess að tryggja betur innviði og hugbúnaðarlausnir í rekstri setti upplýsingatæknideild upp skoðanleika í rekstri. Enn fremur var leitarvélin á meginvef Hagstofunnar betrumbætt á árinu. Þá kom upplýsingatæknideild að innleiðingu á nýju aðgangskerfi fyrir húsnæði stofnunarinnar í lok ársins. Auk alls þessa kom deildin að ýmsum öðrum verkefnum sem unnið verður áfram með á næstu árum þótt þau hafi ekki klárast á árinu.